දකුණු පළාතේ ජනතාව ඉඳිකිරීම් ක්‍ෂෙත‍්‍රය පිළිබඳව විශාල දැනුම් සම්භාරයක් එක්රැස් කරගෙන ඇති අතර එය අතීතයේදී විහාරස්ථාන, දාගැබ්, වැව් අමුණු හා නිවාස මෙන්ම ඕලන්ද සමයේ ඉඳිකරන ලද ගොඩනැගිලි වල සම්ප්‍රදායන් අප ප‍්‍රදේශයේ ජනතාව තුළ ඇති සුවිශේෂි දක්ෂතාවයන් මනාව පිළිබිඹු කරන සංකේත වේ. විශේෂයෙන්ම අද යුගය හා සලකා බැලීමේදී තත්කාලීන සමාජ වටපිටාව තුළ ඉඳිවන ඉඳිකිරීම් තුළද අප ජනතාවගේ දක්ෂතාවයන් මනාව දැකගත හැකිය. රාජ්‍ය අංශයේ ඉඳිකිරීම් සදහා උපදේශක සේවා සපයන ආයතනයක් වන අප ආයතනය වෙත පැවරී ඇති සුවිශේෂි කාර්ය භාරය වන්නේ මනා නිමාවකින් හා ශක්තිමත් භාවයකින් යුත් ගොඩනැගිලි ඉඳිකර ජනතාවගේ අභිවෘද්ධිය සදහා ලබා දීමයි.

තවද අප සාඩම්බරයෙන් සිහි කල යුතු කරුණක් වනුයේ අප ආයතනය දැනට පළාත තුළ ඉදිරියෙන්ම සිටින උපදේශක සේවා සපයන ආයතනය වේ. අප ආයතනය 1991 වර්ෂයෙන් ආරම්භ වී කෙටිකාලීන කාල පරිච්ජේදයක් තුළදී විශාල මෙහෙවරක් කරමින් ප‍්‍රදේශයේ ජනතාව ගේ අපේක්ෂාවන් ඉටු කර දෙමින් රටක් තුල සමෘද්ධිමත්ම පළාත් සභාවක් බිහි කිරීමේ නොමද සහයෝගය ලබා දී ඇත. වර්ෂ 1994 මෙම ආයතනය නව මුහුණුවරකින් යුක්තව නවීකරණය විය. එම නව ක්‍රමය තුළ කාර්යාලීය මුහුණුවර වෙනස් වූ අතර එහි ආයතන ප්‍රධානියා නියෝජ්‍ය ප්‍රධාන ලේකම් (ඉංජිනේරු සේවා) ලෙස නම් කෙරිණි. මෙම ව්‍යුහය යටතේ නව තනතුරු කිහිපයක් ආයතනයේ ස්ථාපිත කෙරිණි.

දකුණු පළාත් ඉංජිනේරු සේවා ආයතනය ආරම්භයේදී සීමිත මානව හා භෞතික සම්පත් වලින් යුක්තව ආරම්භ වුවද අප විසින් මේ දක්වා ඉටුකරන ලද කාර්ය භාරය සුවිශේෂ ස්ථානයක් උසුලයි. ආරම්භයේදී ඉංජිනේරුවන් 04 දෙනෙකුගෙන්ද තාක්ෂණ නිලධාරී 88 දෙනෙකුගෙන්ද ලිපිකරු කාර්ය මණ්ඩලය 34 දෙනෙකුගෙන්ද යුක්තව ආරම්භ වූ මෙම ආයතනය අදවන විට වරලත් හා උපාධිධාරි ඉංජිනේරුවන් 11 දෙනෙකුගෙන්ද, විදුලි ඉංජිනේරු දෙදෙනෙකුගෙන්ද, වාස්තු විද්‍යාඥයින් තිදෙනෙකුගෙන්ද, ගණකාධිකාරී, පරිපාලන නිලධාරී, තාක්ෂණ නිලධාරි 239 දෙනෙකුගෙන්ද, සංවර්ධන නිලධාරී 12,කළමනාකරණ සේවා නිලධාරීන් 49 දෙනෙකුද, තොරතුරු හා සන්නිවේදන තාක්‍ෂණ සහකාරවරුන් තිදෙනෙකුගෙන්ද, විදුලි කාර්මිකවරුන් තිදෙනෙකුගෙන්ද, අනෙකුත් කාර්ය මණ්ඩලය 30 දෙනෙකු දක්වා වර්ධනය වී ඇත. එදා මෙදා තුළ කාලය තුලදී අප විසින් ඉටුකරනු ලැබූ සේවාව අනභිබවනීය අයුරින් හා ප්‍රශස්ථ ලෙස ඉටුකර ඇති බව අපගේ විශ්වාසයයි.